Cuirfidh an tseirbhís nua roghanna iompair áisiúla, inacmhainne ar fáil do phobail áitiúla agus do chuairteoirí
Tá an tÚdarás Náisiúnta Iompair (ÚNI) ag seoladh seirbhís bus baile nua i bPort Laoise, a fheabhsóidh nascacht agus a fheabhsóidh roghanna iompair áitiúla, mar chuid de líonra iompair phoiblí TFI.
Cuirfear tús le hoibríochtaí na seirbhísí nua Dé Domhnaigh, an 23 Feabhra, agus cuirfear naisc fheabhsaithe ar fáil le lár an bhaile, leis na hospidéil agus leis na seirbhísí iarnróid, rud a éascóidh an taisteal ar aghaidh.
Tá na seirbhísí á maoiniú ag an Údarás Náisiúnta Iompair agus á dtacú ag Comhairle Contae Laoise.
Feidhmeoidh an tseirbhís bus baile CityDirect dhá bhealach tiomnaithe, an PL1 agus an PL2, agus rachaidh busanna gach leathuair an chloig sa dá threo.
Feidhmeoidh an tseirbhís PL1 idir Lána an Choiléirigh agus Woodgrove, agus beidh an PL2 ag taisteal idir Coill Mhinsí agus Bellingham. Feidhmeoidh an dá bhealach ar feadh níos mó ná naoi n-uaire dhéag sa lá ó Luan go Satharn, agus sé huaire dhéag ar an Domhnach.
Cuirfidh PL1 agus PL2 seirbhísí ar fáil go luath ar maidin agus amach sa tráthnóna, chun nascadh le stáisiún traenach Phort Laoise, rud a éascóidh taisteal níos fearr ar aghaidh go Baile Átha Cliath, Corcaigh, Luimneach agus ionaid eile.
Cuirfidh na seirbhísí feabhas freisin ar nascacht le criosanna miondíola amhail Lár Bhaile Phort Laoise agus Ionad Siopadóireachta Laoise, chomh maith le hOspidéal Réigiúnach Lár na Tíre, Port Laoise agus Ospidéal Naomh Fionntáin.
Déanfar na seirbhísí a chomhtháthú le hAip Bheo TFI agus éascóidh siad íocaíochtaí gan airgead tirim leis an gcóras Táillí Cárta Leap. Glacfar le Pasanna Saorthaistil ar bord freisin.
Is é Port Laoise an baile is déanaí a bhainfidh tairbhe as infheistíocht ón Údarás Náisiúnta Iompair i seirbhís bus baile. Tá deich mbaile seirbhíse in Éirinn anois, ina measc Baile Átha Luain, Baile Brigín, Ceatharlach, Droichead Átha, Cluain Meala, Dún Dealgan, Cill Chainnigh, an Uaimh agus Sligeach agus tuilleadh le teacht i mbliana agus an bhliain seo chugainn.
Ag caint, roimh an seoladh, dúirt Stiúrthóir Seirbhísí Iompair Phoiblí an Údaráis Náisiúnta Iompair, Jeremy Ryan: “Céim shuntasach chun tosaigh is ea seirbhís bus bhaile Phort Laoise chun iompar poiblí inbhuanaithe agus inrochtana a chur ar fáil do phobail áitiúla. Fágfaidh na bealaí nua sin go mbeidh sé níos éasca ná riamh do dhaoine dul ag obair, ar scoil nó freastail ar choinní agus taitneamh a bhaint as gach a bhfuil ar fáil i bPort Laoise.”
Dúirt Padraig Fleming, Cathaoirleach Chomhairle Contae Laoise:
“Tá ríméad orm a bheith i láthair ag seoladh oifigiúil Sheirbhís Bus Bhaile Phort Laoise. Bainfidh Port Laoise tairbhe as an tseirbhís nua iompair phoiblí seo, a chuireann deiseanna áisiúla ar fáil go háitiúil le haghaidh cineálacha iompair níos inbhuanaithe agus níos áisiúla.
“D’oibrigh Comhairle Contae Laoise i ndlúthchomhar leis an Údarás Náisiúnta Iompair le roinnt blianta anuas chun tacú le feidhmiú céimneach na seirbhíse. Leanfaidh an Chomhairle de thacaíocht a chur ar fáil don tseirbhís.
“I gcás go leor daoine, i bPort Laoise, cuireann an tseirbhís bus nua rogha taistil inmharthana ar fáil sa bhaile seachas an gluaisteán príobháideach a úsáid. Soláthraíonn an tseirbhís nua nascacht gan fasach laistigh de bhaile Phort Laoise chomh maith, trí rogha iompair inacmhainne, inbhuanaithe agus áisiúil a chuir ar fáil do dhaoine i bPort Laoise. Mar fhocal scoir, tréaslaím le gach duine a thacaigh le seachadadh na seirbhíse seo a bhfuil géarghá léi do Phort Laoise.”
Dúirt Michael Rainey, Príomhoifigeach Feidhmiúcháin Chomhairle Contae Laoise:
“Tá Port Laoise ar cheann de na hionaid daonra is mó fás in Éirinn. In 20 bliain, ó Dhaonáireamh 2002 go Daonáireamh 2022, tháinig dúbailt ar dhaonra Phort Laoise go 24,000.
“Le tús a chur leis an tseirbhís nua bus seo i bPort Laoise, comhlíontar cuspóirí iompair inbhuanaithe a leagtar amach i bPlean Ceantair Áitiúil Phort Laoise. Tacaíonn sé le cuspóirí Chomhairle Contae Laoise chun Port Laoise a fhorbairt mar bhaile ísealcharbóin.
“Le roinnt blianta anuas, tá dlúthchaidreamh déanta ag ár bhfoireann leis an Údarás Náisiúnta Iompair, ag tacú le tabhairt isteach na seirbhíse tábhachtaí seo. Ba mhaith liom aitheantas agus buíochas a ghabháil leis an Údarás Náisiúnta Iompair as an infheistíocht sa tseirbhís nua seo do Phort Laoise.
“Cuireann an tseirbhís bus i bPort Laoise roghanna taistil níos inbhuanaithe chun cinn don obair, don oideachas, don chúram, don fhóillíocht agus don turasóireacht. Táimid ag tnúth le tús a chur leis an tseirbhís Dé Domhnaigh, an 23 Feabhra 2025.”
Dúirt Príomhoifigeach Feidhmiúchán City Direct: “Tá áthas ar City Direct Bus Ltd a bheith ainmnithe chun a seirbhís bus baile nua a chur ar fáil do mhuintir Phort Laoise. Táimid ag tabhairt ár gcuid eolais agus taithí go Port Laoise chun Seirbhís den chéad scoth a sholáthar. Beidh gach duine in Éirinn in ann an-tairbhe a bhaint as an tseirbhís seo. Táimid ag tnúth le tú a fheiceáil ar bord!”
Ní chríochnófar gach bonneagar faoi sheoladh na seirbhísí, toisc go raibh sé mar thosaíocht tús a chur le hoibríochtaí a luaithe is féidir chun naisc fheabhsaithe a sholáthar do mhuintir na háite agus do chuairteoirí. Leanfar le hiarrachtaí sna míonna amach romhainn chun a chinntiú go gcuirfear gach uasghrádú riachtanach ar stadanna bóthair agus bus i bhfeidhm. Iarrtar ar phaisinéirí a bheith foighneach le linn na tréimhse seo.
Chun tuilleadh eolais a fháil faoi Sheirbhís Bhus Bhaile Phort Laoise, téigh anseo
