Mic léinn chun tairbhe a bhaint as seirbhísí leathnaithe ó Chill Dara thuaidh/Baile Átha Cliath thiar ón 3 Márta.
D’fhógair an tÚdarás Náisiúnta Iompair (ÚNI) agus Bus Átha Cliath go mbeidh 45 seirbhís buaicthréimhse idir Stáisiún Heuston agus UCD ón Luain an 3 Márta.
Cuirfear nascacht ar fáil idir Heuston agus Belfield anois le gach seirbhís ar bhealaí X25, X26, X27, X28, X30, X31 agus X32 lena n-áirítear 25 imeacht ag buaicthréimhse na maidine agus 20 ceann sa tráthnóna.
Cuirfear tús le seirbhísí X óna 6.40am ar maidin, agus iad ag teacht ar ais óna 16.12 san iarnóin.
Cé go mbíonn freastal á dhéanamh ag X25, X27, X28 agus X30 ar UCD cheana féin, beidh paisinéirí á mbailiú acu anois ó Heuston den chéad uair.
Beidh síneadh á chur le bealaí X26, X31 agus X32 ó lár na cathrach go Belfield, agus beidh paisinéirí á mbailiú ó Heuston freisin.
Dúirt Stiúrthóir Seirbhísí Iompair Phoiblí ÚNI Jeremy Ryan: “Agus Céim 6a den Athdhearadh Líonra BusConnects á cur i bhfeidhm, bhí roinnt aiseolais maidir le nasc díreach idir Heuston agus UCD a raibh deireadh curtha leis. Bhíomar sásta féachaint air sin arís agus d’iarramar ar Bhus Átha Cliath na bealaí buaicthréimhse X lena bhfreastalaítear ar stáisiún Heuston a leasú mar fhreagairt.
“Ciallaíonn an fógra seo gurb ann anois do nasc iompair áitiúil dhíreach chuig UCD le haghaidh níos mó pobal in áiteanna i gCill Dara thuaidh agus Baile Átha Cliath thiar ná mar a bhí riamh. Ciallaíonn sé freisin gur féidir le mic léinn ó cheantair eile, agus seirbhísí iarnróid bhuaicthréimhse go agus ó Heuston á n-úsáid acu, nascadh go héasca le Belfield.”
Dúirt urlabhraí Bhus Átha Cliath, Blake Boland, go raibh “Bus Átha Cliath ag obair go dlúth leis an ÚNI ar CHéim 6a Bus Connects. Leis seo, tá nascacht mhéadaithe á cur ar fáil phaisinéirí atá ag taisteal i mBaile Átha Cliath agus sa cheantar máguaird. Mar sin féin, bhí ann d’athailíniú ar roinnt bealaí mar gheall ar na hathruithe seo. Chun nascacht dhíreach le UCD a mhéadú, chuireamar síneadh le roinnt bealaí ag an mbuaicthráth tráchta. Tá ríméad orainn a fhógairt go gcuirfear tús leis na síntí seo ar an tseirbhís ar an 3 Márta.”
Is féidir le custaiméirí atá ag taisteal idir Heuston agus UCD lasmuigh de bhuaicthréimhsí leas a bhaint as bealaí bus 4, C1, C2, C3, C4, 52 nó 60 chuig ceantar Dhroichead Uí Chonaill agus aistriú leis an E1 nó E2 ó dheas. Nascacht chomhchosúla a chur ar fáil ag an Luas Líne Dhearg ó Heuston.
Tá tuilleadh eolais agus cláir ama nuashonraithe ar fáil ag Bus Átha Cliath – Cláir Ama Athbhreithnithe ar Bhealaí X25, X26, X27, X28, X31 agus X32. Moltar do phaisinéirí freisin úsáid a bhaint as an Pleanálaí Turais TFI / TFI Live App chun do bhealach a phleanáil, agus is féidir leo nuashonruithe a fháil ar chainéil Twitter/X @dublinbusnews agus @TFIUpdates.
