Tagann an tAire Eamon Ryan agus an tAire Stáit James Lawless in éineacht leis an ÚNI chun Babhta 3 den chlár a fhógairt
Bainfidh 414 scoil go náisiúnta leas anois as bonneagar níos sábháilte os comhair na scoileanna
Tháinig an tAire Iompair Eamon Ryan agus an tAire Stáit James Lawless in éineacht leis an Údarás Náisiúnta Iompair (ÚNI) ag Scoil Náisiúnta an Linbh Naofa i Nás Co. Chill Dara le fógairt go mbainfidh 141 scoil bhreise ar fud na tíre leas as Babhta 3 den chlár Bealaí Sábháilte chun na Scoile (BSCS).
Leathnóidh an chéim is déanaí seo na feabhsuithe móréilimh ‘Crios na Scoile’ chuig níos mó scoileanna ar fud na tíre, ag baint úsáide as gnéithe dearaidh so-aitheanta, amhail mullaird i gcruth peann luaidhe, marcanna bóthair ildaite, cosáin fheabhsaithe agus trasrianta coisithe chun láithreacht na scoile a aibhsiú agus chun trácht a spreagadh le moilliú agus chun taisteal gníomhach i measc na mac léinn agus a mhéadú.
Den chéad uair, beidh scoileanna ar Bhóithre Tuaithe Ardluais (BTAL) san áireamh sa chlár agus 67 de na 141 scoil a fógraíodh inniu sa chatagóir seo. Beidh an cur chuige dearaidh ag na scoileanna seo difriúil ón chur chuige caighdeánach ‘Crios na Scoile’ agus díreofar ar thiománaithe a chur ar an airdeall faoi láithreacht scoileanna agus ar luasanna níos ísle agus tiomáint níos airdeallaí a spreagadh. Bainfear é seo amach trí chomharthaí agus marcanna bóthair os comhair na scoile. Tá cuimsiú scoileanna ar Bhóithre Tuaithe Ardluais ag teacht i ndiaidh trialacha rathúla níos luaithe i mbliana i nGaillimh, i Ros Comáin agus i nDún na nGall, i gcomhar le Bonneagar Iompar Éireann agus na hÚdaráis Áitiúla, inar tháinig laghdú suntasach ar luas i gcóngar na scoileanna trialach.
Cuireann an clár BSCS, a seoladh in 2021, maoiniú spriocdhírithe ar fáil d’údaráis áitiúla chun timpeallachtaí os comhair scoileanna níos sábháilte agus bonneagar siúil agus rothaíochta feabhsaithe thart timpeall ar scoileanna a fheabhsú. Trí phlódú tráchta a mhaolú agus nósanna taistil atá sábháilte agus inbhuanaithe a chothú, tá sé mar aidhm ag an gclár comaitéireacht ghníomhach a dhéanamh níos inrochtana do mhic léinn ar fud na tíre.
Nuair a seoladh an clár, rinne 932 scoil iarratas, beagnach an ceathrú cuid de na scoileanna uile go náisiúnta. Agus Babhta 3 á sheoladh inniu, bhí 414 scoil páirteach go gníomhach sa chlár go dtí seo. Tá Scoil Náisiúnta an Linbh Naofa ar cheann de na scoileanna ina bhfuil oibreacha tógála críochnaithe lena n-áirítear na mullaird i gcruth peann luaidhe, marcanna bóthair ildaite agus trasrianta síogacha nua
Tá an clár maoinithe ag an Roinn Iompair tríd an Údarás Náisiúnta Iompair (ÚNI). Tá an clár á chomhordú ag an Aonad Oideachais Chomhshaoil de chuid An Taisce. Tá maoiniú ar fáil d’údaráis áitiúla chun an bonneagar a chur ar fáil trí Leithdháileadh Taisteal Gníomhach an ÚNI ón Roinn Iompair .
Agus é ag labhairt ag an ócáid seolta, dúirt an tAire Eamon Ryan: “Nuair a bhí mise ar an mbunscoil, shiúladh formhór na leanaí – mé féin san áireamh – chuig an scoil agus ar ais ón scoil gach lá. Ar ndóigh, tá athrú mór tagtha ar ár mbóithre ó shin, ach mar sin féin, laistigh den timpeallacht ina mairimid inniu, sílim go bhfuil sé chomh tábhachtach céanna gur féidir ligean do leanaí na linne seo dul isteach agus amach óna gcuid scoileanna go sábháilte.
Tá cúis eile ann go gceapaim gur tionscadal ríthábhachtach é seo. Anuraidh, thug mé cuairt ar scoil i nGaillimh agus dúirt na leanaí liom gur thaitin an bealach sábháilte chun na scoile leo toisc go raibh siad níos suaimhní agus níos sona nuair a bhaineadh siad an scoil amach.”
Tá súil agam go bhfuil tuilleadh sonais curtha againn le scoileanna go dtí seo, agus beimid in ann tuilleadh suaimhnis agus sábháilteachta a chur leis an timpeallacht thart ar 141 scoil eile mar gheall ar an mbabhta maoinithe nua seo, iad siúd atá ar bhóithre an-ghnóthach go háirithe. Is cúis iontach é i gcónaí tuilleadh sonais agus suaimhnis a thabhairt dár leanaí chun dul i mbun gnímh agus táim ag tnúth leis an gclár seo a fheiceáil ag dul ó neart go neart.”
Dúirt an tAire Stáit James Lawless: “Tríd an bhfógra is déanaí seo, bainfidh na mílte leanaí eile ar fud na hÉireann leas as bealaí scoile níos sábháilte. Tá lúcháir orm an tionscnamh seo a fheiceáil ag sroicheadh níos mó pobal arís ar fud na tíre. Baineann an clár seo le níos mó ná bonneagar amháin; Baineann sé le todhchaí níos sábháilte, níos sláintiúla agus níos nasctha a chruthú dár leanaí. Is ábhar misnigh ar leith é cuimsiú 67 scoil ar Bhóithre Tuaithe Ardluais den chéad uair, agus tá súil agam go mbeidh luasanna níos ísle agus nósanna tiomána feabhsaithe lasmuigh de na scoileanna seo mar thoradh air.’
Dúirt Anne Graham, POF an ÚNI: “Ba mhór an t-ábhar misnigh é líon na ndaoine óga atá ag dul i méid a fheiceáil ag rothaíocht agus ag siúl chun na scoile mar gheall ar na tionscadail Bhealaí Sábháilte chun na Scoile ar chabhraigh leis an ÚNI iad a chur ar fáil i gcomhar lenár nÚdaráis Áitiúla comhpháirtithe. Táimid tiomanta do mhaoirseacht a dhéanamh ar sheachadadh na dtionscadal nua agus an tríú babhta den chlár á fhógairt againn agus a chinntiú go mothaíonn scoileanna i ngach cearn den tír a thionchar dearfach. Sin é an fáth go bhfuil béim chomh láidir ar scoileanna tuaithe i mbliana. Leanfaimid lenár ndlúthchomhpháirtíocht láidir leis an Aonad Oideachais Chomhshaoil de chuid An Taisce, a chomhordaíonn na cláir Scoileanna Glasa agus Bealaí Sábháilte chun na Scoile, agus le húdaráis áitiúla ar fud na tíre. Is mór an spreagadh é níos mó daoine óga a fheiceáil ag úsáid roghanna taistil inbhuanaithe gach lá, agus le gach babhta tionscadal nua, táimid ag socrú taistil ghníomhach mar rogha níos sábháilte do phobail.”
